Elbasy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda eńbek naryǵynyń tıimdiligin qamtamasyz etýdiń, árbir adamnyń óz áleýetin iske asyra alýy úshin jaǵdaı jasaýdyń qajettiligin atap kórsetken bolatyn.
Bul oraıda ozyq tehnologııalardy óndiriske engizý, keńinen qoldaný, eń aldymen sıfrlandyrý jónindegi pılottyq baǵdarlamalarǵa júginý mamandardy kásibı jaǵynan daıyndaýdyń, biliktiligin arttyrýdyń mańyzdy qadamy bolyp tabylary sózsiz. Oblys ortalyǵynda jumyssyz azamattar úshin sandyq saýattylyqqa oqytý boıynsha IT-ortalyǵynyń ashylatyny sonyń bir aıǵaǵy bolyp tabylady. «Nur Otan» partııasy oblystyq fılıalynda ótken basqosýǵa jumyspen qamtýdy úılestirý jáne áleýmettik baǵdarlamalar basqarmasy men «Esil» damytý aımaqtyń ortalyǵynyń ókilderi qatysyp, jumyssyz azamattar jáne ózin-ózi jumyspen qamtýshylar úshin IT-ortalyqtarynq urý, sıfrlyq jobalardy júzege asyrý máseleleri aıasynda oı-pikirler almasyp, memorandýmǵa qol qoıdy.
Fılıal tóraǵasynyń birinshi orynbasary Artýr Moldaǵulov memorandýmda partııanyń jańa jobasyn júzege asyrýdyń alǵysharttary qarastyrylǵanyn, ondaǵy maqsat azamattardyń sandyq saýattylyǵyn arttyrýdy jáne bilikti IT-mamandar pýlyn ázirleýdi ditteıtinin atap kórsetti. Taıaý arada oblys ortalyǵynda eki IT- ortalyǵy ashylatynyn, bul jumys aýdandarda da jalǵasatynyn jetkizdi. Alǵashqy jyly júzden astam mamandardy oqytý josparlanǵan. Jobanyń qatysýshylary suranysqa ıe sıfrlyq daǵdylaryna jáne baǵdarlamalardyń zamanaýı tilderinde oqytylatyn bolady.Túlekterdi jumysqa ornalastyrýǵa járdem beriledi. Onyń túpki qorytyndysy IT-kásipkerlikti damytý basymdyǵyna negizdeledi. Jumyspen qamtýdy úılestirý jáne áleýmettik baǵdarlamalar basqarmasy aldynda IT-ortalyqtarynyń tizbesin aıqyndaý mindeti tur. Qala men aýdandyq jumyspen qamtý ortalyqtaryna IT-ortalyqtarǵa oqýǵa jiberiletin tulǵalardyń kontıngentin naqty anyqtaý tapsyrmalary júkteldi. О́z kezeginde «Esil» damytý aımaqtyq ortalyǵy IT-mamandardy daıarlaý jáne oqytý boıynsha qyzmetter usynatyn bolady.
Bıyl «Nur Otan» partııasy azamattardy aýqymdy qamtıtyn jáne partııa qyzmetin transformasııalaýdyń jańa baǵdarlamalaryn usynǵany belgili. О́ńirde «Sandyq partııasy», «Balalar úshin tegin IT-synyptar» jobalaryna basymdyq berilip otyr.
О́mir ESQALI,
«Egemen Qazaqstan».
Soltústik Qazaqstan oblysy.